Boosaaso: (Sh. M. Network) Hogaamiyihii dhawaan isaga iyo ciidamadiisa dagaalka la galay ciidamada Maamulka Puntland ayaa markii ugu horeysay ka hadlay cid rasmiga ee uu xariirka la leeyahay isagoo iska fogeeyay in uu ka tirsanyahay Al Shabaab.

Kadib markii maalmihii u dambeeyay ay soo baxayeen warar sheegaya in hogaamiye diimeedkii dhawaan dagaalka la galay ciidamada Maamulka Puntland uu ka tirsanyahay Xarakada Mujaahidiinta Al Shabaab ayaa waxaa arimihaasi si kulul uga hadlay oo beeniyay hogaamiye diimeedkaasi Max’ed Saciid Atam xili uu la hadlayay Idaacada VOA-da.

Waxaa uu sheegay ATAM in isaga iyo ciidamadiisu aysan wax xariir ah la laheyn Xarakada Mujaahidiinta Al Shabaab iyo Ururka Al qaacida, waxaana uu sheegay in dagaaladii dhawaan ka dhacay Puntland ay sabab u ahayeen weeraro uu sheegay inay ku soo qaadeen ciidamada PIS-ta Puntland.

Max’ed Saciid Atam waxaa uu sheegay in Al Shabaab Afhayeenadooda ay cadeeyeen in uusan xariir la laheeyn, isagoo intaasi ku daray in  dagaalku uu yimid kadib markii uu go’doomiyay Maamulka Puntland waxaana uu beeniyay in ay weerarka markii hore iyagu soo qaadeen.

Hogaamiyaha koox diimeedka ku sugan deegaanada Gagala iyo Karin ayaa isaga oo aan dafireyn Madaxtinimada Madaxweyne Faroole waxaa uu sheegay in uu horey dhowr jeer ugu cel celiyay inay ku hareereysaanyihiin ciidamadiisa.

Atam ayaa waxaa uu beeniyay oo uu meesha ka saaray in deegaanada ay ku suganyihiin ee Galgala iyo Karin ay joogaan dad Ajanabi ah waxaana isagoo kaftamaya uu sheegay in xitaa halkaasi aysan ku sugneyn dad ka soo jeeda koofurta dalka Soomaaliya.

Waxaa uu ku saleeyay dagaalka uu kula jiro Maamulka Madaxweyne Faroole in uu yahay balan ka baxyo uu kula dhaqaaqay Madaxweyne Faroole taasi oo aheeyd in uu meesha ka saaro ciidamada PIS-ta Puntland oo uu sheegay inay yihiin Ashahaado la dirir, isagoo ku eedeeyay Faroole in uu xoojiyay Ciidamadasi iyo dhac uu tilmaamay in maamulka Puntland ay u geysanayaan dadka shacabka ah.

Hadalka Hogaamiyahaani dhawaan dagaalka kala horyimid Maamulka Puntland ayaa ku soo aadaya xili maalmihii u dambeeyay la hadal hayay in uu xariir la leeyahay Al Shabaab, walow arinkaasi Maalin ka hor uu beeniyay Afhayeenka Al Shabaab, hase ahaatee qaar ka mid ah aqoonyahanada Puntland ayaa qaba in Max’ed saciid Atam uusan ka fakir duwaneyn Al Shabaab maadaama uu la soo baxay calaamado iyaga u gaar ah.

Aqriso oo la soco Shabelle.net Saacad Walba si aad u hesho wararkii ugu dambeeyay ee Soomaaliya.

NALA SOO XARIIR This e-mail address is being protected from spambots. You need JavaScript enabled to view it